राष्ट्रीय बॅडमिंटन स्पर्धा: पीव्ही सिंधूचा उपांत्यपूर्व फेरीत प्रवेश

नागपूर। येथे सुरु असलेल्या राष्ट्रीय बॅडमिंटन स्पर्धेत भारताची स्टार बॅडमिंटनपटू पी व्ही सिंधूने उपउपांत्यपूर्व फेरीत रेवती देवस्थळे विरुद्ध विजय मिळवत उपांत्यपूर्व फेरीत प्रवेश केला आहे.

सिंधूने हा सामना २१-१६, २१-०२ असा सरळ सेटमध्ये जिंकला. सामन्याच्या पहिल्या सेटमध्ये रेवतीने चांगला खेळ केला होता. तिने सुरवातीलाच ६-४ अशी आघाडी मिळवली होती. नंतर हा सेट ९-९ असा बरोबरीचा झाला.

या नंतर मात्र सिंधूने तिच्या अनुभवाच्या जोरावर रेवतीला आघाडीवर जाण्यापासून रोखले आणि अखेर सेट २१-१६ असा जिंकला.

दुसऱ्या सेटमध्ये सिंधूने रेवतीला कोणतीही संधी दिली नाही. तिने १-१ अश्या सुरवातीनंतर १९-१ अशी भरभक्कम आघाडी घेतली आणि हा सेट २१-२ असा सहज जिंकत सामनाही आपल्या नावावर केला.